• Home »
  • ХАБАР »
  • Оғози парвандаи ҷиноятӣ нисбати блогерон вобаста ба паҳн кардани маълумот оид ба ҳаёти шахсӣ
Оғози парвандаи ҷиноятӣ нисбати блогерон вобаста ба паҳн кардани маълумот оид ба ҳаёти шахсӣ

Оғози парвандаи ҷиноятӣ нисбати блогерон вобаста ба паҳн кардани маълумот оид ба ҳаёти шахсӣ

  Бо пешравии илму техника фаъолияти иттилоърасонӣ низ ташаккул ёфта, шаклу усулҳои нави ин фаъолият ба миён омадааст. Мақсад аз чунин фаъолият ин пеш аз ҳама расонидани иттилоъ ба мардум буда, мебояд дар доираи меъёрҳои муайяни ахлоқӣ роҳандозӣ гардад. Мутаассифона аз имкониятҳои техникии муосир ва шаклҳои нави фаъолияти иттилоърасонӣ баъзе аз нафарон ба истилоҳ блогерон, гарчанде маълумоти соҳаҳои журналистӣ, телекоммуникатсионӣ ва техникӣ надоранд бо мақсади ба даст овардани манфиатҳои пулӣ ба таҳияи барномаҳои интернетӣ даст зада, бо вайрон кардани меъёрҳои ахлоқӣ ва этикаи касбии журналистӣ ба паст задани шаъну шарафи шаҳрвандон чунин тарзи фаъолиятро ба роҳ мондаанд.
  Наворе, ки чанде пеш дар шабакаи интернетии Ютуб таҳти унвони “Барон ва Рустам, рейди фоҳишаҳо дар трасса” аз ҷониби ду нафар (дар маҷмуъ бо наворгиру танзимгар чаҳор нафар) ба истилоҳ блогерон оиди дар ҳудуди шаҳри Душанбе ба фоҳишагӣ даст задани занону духтарон нашр шуд, мавриди вокуниш ва интиқоди шадиди корбарони шабакаҳои иҷтимоӣ қарор гирифт. Воқеан таҳиякунандагони ин навор меъёрҳои ахлоқиро риоя накарда, дар баробари ошкорнамоии шахсияти онҳо ҳамзамон шаъну шарафи занону духтаронро бо ин роҳ паст задаанд, ки боиси муроҷиати занону духтарон ба Раёсати ВКД дар шаҳри Душанбе гардида, муроҷиаткунандагон хостори андешидани чораҳои қонунӣ нисбати таҳиякунандагон ва пахшкунандагони навори мазкур дар шабакаи Интернет шудаанд.
  Кормандони милитсияи пойтахт муроҷиат ва шикояти занонро мавриди омӯзишу баррасӣ қарор дода, дар натиҷаи роҳандозӣ намудани чорабиниҳои оперативӣ-ҷустуҷӯӣ шахсияти ба истилоҳ блогеронро ошкор ва ба мақомоти милитсияи пойтахт дастрас намуданд.
  Дар натиҷаи амалинамоии маҷмӯи чорабиниҳои оперативӣ муайян гардид, ки шаҳрвандон:
1. Беҳрӯзи Шарифи Маҷидиён соли таваллудаш 23.05.1992 сокини ноҳияи Рудакӣ бо тахаллуси “Барон”, маълумоташ олӣ, ровии барнома;


2. Ашуров Рустам Муқимҷонович соли таваллудаш 11.05.1989 зода ва истиқоматкунандаии шаҳри Душанбе, маълумоташ миёна, ровии барнома;


3. Ҷалилов Шаҳриёр Ҷонович соли таваллудаш 19.11.1995 зода ва истиқоматкунандаи шаҳри Душанбе, маълумоташ миёнаи нопурра, барномасоз-танзимгар;


4. Юсуфҷони Давлатмурод соли таввалудаш 05.09.2000 зода ва истиқоматкунандаи шаҳри Душанбе, донишҷӯи бахши 2-юми Донишгоҳи технологии Тоҷикистон, барномасоз-танзимгар
бо таъсис додани шабака бо номи “Авлод-Медиа” дар Ютуб ба сабту пахши наворҳо машғул мебошанд.


  Бояд гуфт, ки таъсиси чунин шабакаҳо ва пешбурди ин тарзи фаъолияти иттилоърасонаӣ мамнуъ набуда, вале он нафароне, ки худро блогер медонанду бо ин роҳ мехоҳанд маблағ ба даст оваранд бояд меъёрҳои ахлоқиро риоя намуда, дар доираи қонун фаъолиятро ба роҳ монанд. Дар акси ҳол боиси ба вуҷуд омадани нофаҳмӣ ва андешидани чораҳои қонунӣ нисбати чунин афрод мегардад.
  Чунончи, ин нафарон дар барномаи мазкур ба таври ғайриқонунӣ ба ҷамъоварӣ ва паҳн кардани маълумот оид ба ҳаёти шахсӣ машғул гардидаанд, ки дар натиҷа сирри шахсӣ ва ё оилавии занону духтарон ошкор ва аз ҷониби таҳиякунандагон бо мақсади ба даст овардани маблағ тавассути Интернет дастраси омма гардидааст. Илова бар ин, дар навори мазкур хусусияти тарғиботии фоҳишагӣ ва тарзу усулҳои хизматрасонии кирдорҳои ғайрихлоқӣ ҷойгир карда шуда, дар он алфози қабеҳ, дашному ҳақорат, ки ба зеҳни истифодабарандагону тамошобинон таъсири манфӣ мерасонад, истифода ва нашр гардидааст. Дар натиҷа ин амалкарди шаҳрвандон ба истилоҳ блогерон Беҳрузи Шарифи Маҷидиён, Ашуров Рустам Муқимҷонович, Ҷалилов Шаҳриёр Ҷонович ва Юсуфҷони Давлатмурод дар доираи қонунҳои амалкунандаи Ҷумҳурии Тоҷикистон мавриди банду баст қарор гирифта, нисбаташон тибқи муқаррароти моддаи 144 Кодекси ҷиноятии Ҷумҳурии Тоҷикистон (Ғайриқонунӣ ҷамъ ва паҳн кардани маълумот оид ба ҳайёти шахси), парвандаи ҷиноятӣ оғоз ва тафтишоти пешакии он аз руи тобеият дар мақомоти Прокуратураи шаҳри Душанбе ба роҳ монда шудааст.
  Дар робита ба масъалаи мазкур Раёсати ВКД дар шаҳри Душанбе иттилоъ медиҳад, ки дар асоси нақшаи муштарак милитсияи пойтахт дар якҷоягӣ бо дигар мақомотҳои ҳифзи ҳуқуқ доир ба пешгирии фоҳишагӣ, танфурушӣ ва дигар кирдорҳои ғайриахлоқӣ дар ҳудуди пойтахт пайваста рейду амалиётҳои пешгирикунандаро баргузор намуда, тибқи муқаррароти қонунгузории кишвар нисбати занони сабукпо муҷозоти қонунӣ таъин карда мешаванд. Аммо бо мақсади ҳифзи ҳуқуқ, озодӣ ва шаъну шарафи онҳо руйхат, ному насаб ва расму навори амалиётҳои баргузоргардида расонаӣ карда нашуда, танҳо барои корбарии мақомотҳои дахлдор истифода бурда мешавад.

Маркази матбуоти Раёсати ВКД дар шаҳри Душанбе

Шарҳ диҳед...
Share on Facebook
Facebook
Share on Google+
Google+
Tweet about this on Twitter
Twitter
Share on LinkedIn
Linkedin