Қаллоби гузаро бо баҳонаҳои гуногун шаҳрвандонро фиреб дода, аз онҳо маблағ ситонидааст
Дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 38-солаи сокини кӯчаи Фирдавсии шаҳри Душанбе бо гумони содир намудани як қатор ҷиноятҳои қаллобӣ дастгир карда шуд.
Номбурда, моҳи декабри соли 2018 бо роҳи фиреб ба боварии марди 41-солаи сокини кӯчаи Ховарони пойтахт даромада, барои аз маҳбас озод намудани бародари хусураш, марди 44-сола, аз ӯ 2500 доллари амрикоӣ гирифта, то ҳол маблағашро барнагардонидааст.
Номбурда моҳи майи соли 2019 бо роҳи фиреб ба боварии марди 38-солаи сокини кӯчаи Фирдавсии пойтахт даромада, аз ӯ 50 000 сомонӣ гирифта, то ҳол маблағашро барнагардонидааст.
Ҳамин тариқ, номбурда моҳи сентябри соли 2018 бо роҳи фиреб ба боварии зани 41-солаи сокини кӯчаи Шоҳтемур даромада, аз ӯ барои кам кардани мӯҳлати ҷазои шавҳараш 31000 доллари амрикоӣ гирифта, то ҳол маблағашро барнагардонидааст.
Бо ҳамин роҳ номбурда моҳи апрели соли 2019 ба боварии марди 35-солаи сокини кӯчаи Фирдавсӣ даромада, аз ӯ автомашинаи тамғаи “Тайота-Кемри-5”-ро ба маблағи 210 000 сомонӣ нархгузорӣ намуда, гирифта, аз ин маблағ 45000-сомониашро дода, боқимонда 165000-сомониашро то ҳол барнагардонидааст.
Аз рӯи ин ҳодисаҳо тафтишот идома дорад.