Бо таҳдид ва роҳзанӣ гирифтани маблағ ва телефонҳои мобилӣ
Ба мақомоти корҳои дохилӣ дар ноҳияи Сино-2 марди 35-солаи сокини ноҳияи Айнӣ дар он хусус муроҷиат намудааст, ки рӯзи 13-уми августи соли 2018, тахминан соати 23:00-дақиқа, шахси номаълум дар кӯчаи Н.Махсум, собиқ бозори “Зарнисор”-и шаҳри Душанбе худашро ронандаи кирокаши шаҳри Ҳисор муаррифӣ намуда, бо ҳамроҳии рафиқонаш ӯро ба автомашинаи тамғаи “Мерседес-Бенс” савор карда, бо роҳи байни биноҳои истиқоматӣ ба кӯчаи Зарафшон оварда, лату кӯб намудаанд. Сипас бо корд номбурдаро таҳдид намуда, аз ӯ бо роҳи зӯроварӣ 470-сомонӣ, 2-адад телефонҳои мобилии тамғаи “Алкател” ва “Сони Эрексон”-ро тасарруф намуда, аз ҷойи ҳодиса ғайб задаанд.
Дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони милитсия дар робита ба ин ҳодиса марди 21-солаи сокини шаҳри Душанбе, ки пеш бо моддаи 244 қисми 2 Кодекси ҷиноятии Ҷумҳурии Тоҷикистон суд шудааст ва марди 22-солаи сокини пойтахт ҳамчун гумонбар дар содир намудани ҷинояти роҳзанӣ дастгир карда шуданд.
Барои муайян ва дастгир намудани ду ҳаммаслаки дигари ҷинояткорон чорабиниҳои оперативӣ-ҷустуҷӯӣ идома дорад.